工作一年，一個仙都儲不到 面對在近日的家庭糾紛+危機中，得靠借朋友錢來過渡，得以暫時平穩下來 三月份計劃去旅行，但現在仍然負債中 壓大得想去瘋狂購物以發洩中心的不忿 因此近日經常冒起「轉工」念頭，但一想到要放棄一些很重要的東西時，總覺得捨不得 這就是近日的我，久病未瘉的我 除了患了感冒之外，我承認，工作兩個月之後開始有衝動購物的情況出現 買衫、買書、買九唔搭八既野 返工雖然開心，但大壓力，加上屋企既麻煩事情，買野得確會令我覺得好過D 我唔知算唔算成癮(就算係都應該唔係好嚴重既~至少我唔會買完野唔記得自己買左，亦唔會同一款衫買幾件)，總之呢種習慣就係會令我儲唔到錢。 如果要分析，大致上可以得出以下結論: 有壓力-->洗錢-->感覺到能夠掌控生活多一D-->月尾唔夠錢-->壓力-->碌卡-->洗錢-->感覺能夠掌握生活多一D-->月頭出糧-->還左一部份卡數-->唔夠錢-->壓力+罪惡感-->洗錢-->感覺能夠掌握生活多一D.... 週而復始 身為朋友既你~有冇發現到我呢個不良惡習呢~~我係咪掩飾得唔錯呢? 再探入D分析 1. 我勁洗錢既時候都係一個人既時候 2. 我甚少向朋友透露自己買左D 咩，朋友亦好少問 3. 情況尚未算好嚴重 近日的家庭糾紛，令我既壓力指數跳升至接近爆煲既程度(我有好多次諗過要嘗試自殘...哈哈,好似中學生)，24小時比壓力追住，超級辛苦 逆境，會磨蝕人意志，令人墮入谷底 但，谷底翻身，係我既個性 對住青年人，對住自己，我都相信，困境好多時由自己造成，而困境亦只有自己先至可以擺脫 將來係靠現在創造 自己唔改變，休想未來會為我而改變 所以，我係今個月實行左「一日洗三十蚊」既行動 一開始真係超辛苦，以前每日平均洗100蚊，買起書上黎仲唔止，仲有，我經常要同D 朋友出街食飯，加埋D 睇舞台劇、零食... 一日30蚊...難過登珠峰 好彩D 朋友都肯配合，曾經都有魔鬼出現家~~~>.< 不過比我力抗左 -.- 但係曾經失敗，就係用左D 錢買左書 >_____< 好辛苦好辛苦，終於來到月中啦 漸漸適應啦...相信呢個勢會持續到月尾 之前一直都想控制自己既洗錢習慣，但係都冇今次咁有決心，要公開比曬D 朋友知，請大家一齊幫手 點解? 第一點，亦都係最重要既一點，就係依家屋企既形勢改變左，我將會用接近50%人工去支付屋企既日常開支，如果我再改變自己用錢既習慣，我就要面對放棄依家呢份工作，轉而尋求另一份高人工，但係可能唔係做自己興趣既工作，而且要放棄我岩岩先起步既「事業」，只有呢一點我前思後想，都覺得唔可以讓步。 第二點，很實際既一點，就係我真係好想去旅行。難得機構肯配合，比我放十幾日假期(甚至可能更多，當然，實際情況好難講)，唔好浪費。我真係會去台灣踩單車的，已經決定好了。 就係基於呢兩個原因，令我打呢篇文章，同埋堅持實行「每日三十」計劃 今個月既卡數經已大大回落左 我亦開始學習做支出記錄同埋預算 如果一切順利，我應該可以安然度過家庭危機，兩個月內應該可以洗曬D 舊賬 之後開始儲旅行資金 如無意外，如果我能夠堅持到3月，我應該可以儲到$16000既旅行資金(如果新年有多d利是的話會仲多)，順利地、無憂無慮地去一轉台灣單車行! 睇到呢度，唔知有冇打破你一直以來對精靈既印象，希望你唔會一直覺得我係一個好成熟處理事情、好勁、好正面...既人啦~令你失望啦 我只係一個好普通既人，我經常做錯事，只係比較懂得掩飾而已，而且身邊既朋友對我都好包容 老實講，我打到黎呢一段，心情舒服好多 但對於「成功儲到旅費」既信心，只係得好少好少... 要對抗一直以來既惡習，真係好辛苦 可能有一日我會放棄 透過呢篇文章，我希望得到大家既支持 我會好努力改變的 加油!!! <--給自己 | 
